تمكن النادي الأهلي من هزيمة الإسماعيلي برباعية نظيفة 4/0، في المباراة التي جمعتهما أمس الأربعاء على استاد برج العرب، في منافسات الجولة الأولى من الدوري الممتاز، أحرز خلالها على معلول الهدف الأول من ركلة جزاء وأضاف بيرسي تاو في أول مشاركة رسمية له مع المارد الأحمر الهدفين الثاني والثالث، وتمكن أحمد عبد القادر من تسجيل الهدف الرابع، لينتهي أولى لقاءات الأهلي في الدوري برباعية نظيفة.
تعليق سامي قمصان على مباراة الأهلي والإسماعيلي
وعلق نجم النادي الأهلي سامي قمصان، مدرب الفريق الأول لكرة القدم، على الأداء الرائع للمارد الأحمر في أولى مباريات الدوري الممتاز، قائلا: “الحمد لله مبروك لكل جماهير النادي الأهلي واللاعبين والجهاز الفني مكسب مهم جدا، والأداء والنتيجة بداية قوية الحمد لله لينا، وإن شاء الله نرجع ثقة الجمهور تاني لينا، ونرجع ننافس على الدوري بإذن الله”.
وتابع سامي قمصان خلال مداخلة هاتفية للإعلامي كريم رمزي ببرنامج “رقم 10” على القناة الأولى: “طبعا جمهور النادي الأهلي متعود على الانتصارات، الحمد لله أخدنا بطولة أفريقيا، لكن تبقى بطولة الدوري ليها طعم تاني”.
طريقة لعب جديدة لـ موسيماني
وعن طريقة اللعب التي بدأ بها الجنوب أفريقي بيتسو موسيماني قال سامي قمصان: “الحمد لله طريقة مش جديدة علينا، وسبق ولعبنا بها قبل كده في مباراة الترجي وصن داونز، ويمكن النهاردة بنلعب بشكل مختلف لكن لازم يكون عندنا دفاع كويس، خط وسط قادر على امتلاك وسط المعلب، إلى جانب هجوم قادر على إحراز الأهداف، ويمكن لو بصيت للأهداف هتلاقيهم كلها من الاختراقات أول هدف بيرسي تاو ضربة جزاء، التاني أفشة وبيرسي تاو، والتالت نفس القصة، والحمد لله اللاعيبة بتستوعب فكر المدير الفني، وبتقدر تنفذ ده في الملعب، والحمد لله على المكسب، لأننا لو مكناش حققنا المكسب كان هيبقى فيه انتقادات كتيرة لينا، لكن الحمد لله لازم تحضر كويس للفرقة إللى بتلعب قصدها وكمان إمكانيات وقدرات اللاعيبة اللي عندك”.
سبب عدم الدفع بـ محمد شريف
وعن عدم الدفع بمحمد شريف والاعتماد على بيرسي تاو، قال سامي قمصان: “إن هناك فكر وتصور للمدرب مبني على حاجات، أولها إن بيرسي لاعيب قوي جدًا، عنده خبرات، لعب في الدوري الإنجليزي، عنده ثقة في نفسه، انسجم مع الفرقة بشكل سريع، لكن أنت بتشتغل على المتاح من اللاعيبة، بناء على الفريق اللي أنت بتلعب قصاده، وفي الآخر أنت بتعمل إللي عليك والتوفيق على ربنا سبحانه وتعالى”.
وعن محمد شريف وعدم الدفع به في مباراة الأهلي والإسماعيلي، قال سامي قمصان: “محمد شريف من اللاعيبة المؤثرة جدًا في الفريق، خاصة في البطولات إللى إحنا شاركنا فيها الموسم الماضي، عنده أهداف مميزة جدا ساعدتنا، هداف الدوري، لاعيب عنده خبرات، لكن في الأول والأخر مش هتقدر تلعب كل المباريات بمحمد شريف لازم تجهز التاني والتالت، لما يبقى عندك بيرسي حالته كويسة وحسام وشريف هتدي الفرصة للأفضلية ومن سيُشارك من عدمه هو قرار مدير فني واللاعبون يلتزمون بذلك، خاصة إننا بنشتغل كوحدة واحدة، وتيم واحد، عندنا فريق إداري كويس، عندنا سيد عبد الحفيظ، من أفضل الإداريين اللي بيقدر يسيطر على اللاعبين، وإن شاء الله الفترة إللى جاية تكون أفضل”.
وعن المدير الفني للنادي الأهلي موسيماني، وهل هو باق من الأهلي أم لا قال سامي قمصان: “موسيماني عارف قيمة ومكانة النادي الأهلي، ويمكن النادي الأهلي منحه هدايا كتيرة وبطولات كتيرة، وهو مبسوط جدًا، ولو بصيت لتجاربه هتلاقي إنه هو اشتغل في 3 أماكن فقط، بيحب الاستمرار، خاصة أنه بيكون عنده مشروع بيشتغل عليه بدليل أنه جاب بيرسي تاو وهو إضافة جيدة وأعاد لاعبين من الإعارة فلا يفعل ذلك سوى من يريد العمل والاستمرار”.
وتابع سامي قمصان: إن موسيماني تأثر جدا، بكلام إن الراجل مش مكمل، إنه له مطالب مادية، الأمر الذي دفع مجلس إدارة النادي الأهلي بالإشادة به كثيرا، مشيرا إلى أن علاقة موسيماني بالخطيب قوية جدًا، وإن شاء الله الاستقرار هيساعدنا أكتر الفترة إللى جاية، إن شاء الله نحقق كل البطولات”.