قال الكاتب الصحفي مجدي الجلاد، إنه لا يرى أزمه في حصول الإعلاميين او الفنانين على الجنسية السعودية لافتا إلى ان عمرو أديب خد الجنسية السعودية ومعرفش الموضوع وراه سر ولا لا، وعادي انه ياخد الجنسية طالما لم يتخلى عن جنسيته المصرية».
مجدي الجلاد: أنا كمان أخدت الجنسية السعودية
وتابع مجدي الجلاد: «أنا بحب السعودية وعشت فيها فترة، واسمي هناك ابو احمد، ومعايا الجنسية السعودية، واصدقائي سعوديين، والجنسية مش جواز سفر دي هوى، وعمرو اديب صديقي وزميلي من اولى جامعة وكلت معاه سندوتشات حلاوة بالقشطة مامته عاملاها، وعمرو اديب هو الاعلامي رقم واحد في الوطن العربي اداءً وكفاءة، ولا اؤاخذه انه خد الجنسية السعودية».
مجدي الجلاد: أم كلثوم كانت عربيتها بتتشال بيها في تونس
وقال الكاتب الصحفي مجدي الجلاد، خلال تصريحات تليفزيونية: “من كتر العبث على السوشيال ميديا وبعض وسائل الإعلام، ومن كتر إعلاء قيمة وحجم الفتنة، بقينا بنشوف ان ده الصح والصح غلط، يعني لو قلت الكلام ده من 50 سنة أن فنان خد جنسية، كان عادي ولا كانت عملت اي حاجة في المجتمع، لأنه كان مجتمع صحي، هو ليه بنقول السعودية بتاخد النجوم وتكرمهم ونعترض، ده اسمه خلل في زاوية الرؤية، لأن أي دولة شقيقة أو غير شقيقة لما تُكرم فنان مصري يبقى بتكرم الفن المصري، طب نقول ايه لام كلثوم لما كانت عربيتها بتتشال بيها في تونس، وعبد الحليم لما لبس الغترة والعقال وغنى مع الخليجيين خليجي، وعمرو اديب مغلطش”.
وأضاف الجلاد قائلًا: “توفيق عكاشة يرجع للمشهد الإعلامي، لانه احسن من ناس كتير موجودة، وله مشاهدين، بغض النظر عن الشريحة اللي بيخاطبها، وهي مختلفة عن اللي انا بخاطبها، وهو مهنيًا افضل من 80 % من اللي موجودين دلوقتي”.