قال يحيي الكومي، رئيس النادي الإسماعيلي، إن النادي الأهلي تاريخ عظيم وجماهير عظيمة ومجلس إدارة أنا بأحترمها، لكن علشان يكون فيه هناك منافسة لازم يدوا فرصة بعض الشيء للأندية الجماهيرية زي الإسماعيلي، والاتحاد والمصري، فعلى سبيل المثال المنظومة الإعلامية كل المذيعين أهلاوية لجنة الحكام كلها أهلاوية، طبعا ده شيء جميل لأن الأهلي قاعدة جماهيرية عريضة جدًا.
يحيي الكومي: لما الأهلي ياخد 300 مليون والإسماعيلي 30 إزاي أنا أكون بطل
وتابع يحيي الكومي خلال مداخلة هاتفية لـ برنامج اللعيب على قناة mbc مصر، لما الأهلي ياخد 300 مليون من شركة الرعاية بريزنتيشن والإسماعيلي ياخد 30 مليون، إزاي أنا أكون بطل، أنا مش بقول عايز زي الأهلي بس على الأقل قربني ليه، علشان أقدر أنافس.
رد سيد عبد الحفيظ على يحيي الكومي
ورد عليه سيد عبد الحفيظ مدير الكرة بالأهلي: أولا حضرتك بتتكلم على القيمية التسويقية لنادي معين أولا دي قواعد معمول بها في كل دول العالم، أنت علشان توصل لـ 300 أو الـ 500 أو المليار حتى ده مش علشان القاعدة الشعبية بس ده علشان البطولات اللي أنت حققتها في الـ 10 أو 12 سنة اللي فاتوا.
وأضاف سيد عبد الحفيظ: فعلشان تساوي نفسك بالنادي الأهلي لازم تحقق نفس البطولات اللي حققها النادي الأهلي، لكن لو هتتكلم على الأستوديوهات التحليلية مع أنها معلومة مش صحيحة 100% لكن إيه علاقته بالملعب، فعلشان أقول أنا عايز 500 مليون أو 700 مليون لازم يكون عندي يا أما عدد بطولات كتير جدًا، أو قاعدة شعبية كبيرة جدًا.
وأوضح مدير الكرة بالأهلي، الفلوس دي بتيجي عن حاجتين يا إما إعلانات يا إما بث، فالشركات مش بترمي فلوسها جزافا، لأ، هي بتنزل الشارع وتعمل إحصائيات وتشوف كام فرد بيشاهد الأهلي وكام فرد بيشاهد الإسماعيلي فعلشان كده تلاقي إعلان الأهلي بيساوي 10 أضعاف الأندية الأخرى.